Próffræðilegir eiginleikar íslenskrar þýðingar GAD-7 í klínísku úrtaki

General Anxiety Disorder Scale (GAD-7) er sjö atriða sjálfsmatskvarði sem notaður er til að skima fyrir almennri kvíðaröskun og meta alvarleika kvíðaeinkenna. Prófanir á erlendum útgáfum GAD-7 benda flestar til þess að mælingar með kvarðanum séu áreiðanlegar en þáttabygging hans virðist ekki stöðug í ólíkum úrtökum og sértækni hefur einnig reynst ófullnægjandi. Markmið rannsóknar- innar var að kanna próffræðilega eiginleika íslenskrar þýðingar GAD-7 í klínísku úrtaki. Leitandi þáttagreining var notuð til að meta þáttabyggingu íslenskrar þýðingar GAD-7, auk þess sem innri áreiðanleiki íslenskrar þýðingar kvarðans var metinn. Gögn frá 266 sjúklingum sem leituðu til heilsugæslustöðva (188 konum og 38 körlum) og voru kvíðnir og/eða þunglyndir samkvæmt klínísku mati voru notuð. Innri áreiðanleiki var góður ωt = 0,90 en meðalskor kvarðans var lágt og einnig hlutfall þeirra sem greindust kvíðnir. Samkvæmt leitandi þáttagreiningu skýrði einn þáttur best fylgni á milli atriða GAD-7 en þátturinn skýrði 57% af heildarbreytileika fylgnifylkisins. Þáttahleðslur allra atriða voru ásættanlegar eða á bilinu 0,53 til 0,87. Fyrstu niðurstöður á próffræðilegum eiginleikum íslenskrar þýðingar GAD-7 lofa góðu um gagnsemi listans sem mælitæki fyrir kvíðaeinkenni hér á landi en sýna einnig að þörf er á lagfæringum og frekari rannsóknum.