Réttmætisathugun á íslensku útgáfu HEXACO-60

HEXACO persónuleikalíkanið gerir ráð fyrir að persónuleika sé hægt að útskýra með sex persónuleikaþáttum. Í þessari rannsókn voru próffræðilegir eiginleikar íslensku útgáfu persónuleikaprófsins HEXACO-60 athugaðir með staðfestandi þáttagreiningu. Fylgni var einnig könnuð á milli persónuleikaþátta HEXACO-60 innbyrðis, ásamt því að tengsl persónuleikaþátta við aldur og kyn voru skoðuð. Þátttakendur voru 319 talsins, frá 18 ára aldri. Innra samræmi undirþátta og prófsins í heild var ásættanlegt. Líkanið passaði vel samkvæmt RMSEA og SRMR mælitölunum, en síður samkvæmt kí-kvaðrat, CFI og TLI. Þáttahleðslur voru í veikari kantinum; minna en helmingur atriða náði hleðslu ≥ 0,50. Nokkur munur var á styrkleika þáttahleðslna milli undirkvarða prófsins. Misvísandi niðurstöður á mátun líkansins má meðal annars skýra með fjölda atriðapara með fylgni á milli villuþátta, ásamt atriðum sem hlaða á fleiri þætti en þann sem þeim var ætlað að mæla. Mælt er með endurskoðun á að minnsta kosti hluta íslenskrar útgáfu HEXACO-60, en ekki er mælt gegn notkun á prófinu í núverandi mynd, með viðeigandi fyrirvörum í hverju tilfelli.