Efling foreldrafærni meðal flóttafólks: Er það fýsileg meðferðarnálgun við íslenskar aðstæður?

Flóttafólk er sístækkandi hópur í Evrópu sem glímir við mikið álag og áföll og býr því við þá áhættu að þróa með sér aðlögunarvanda. Til að styðja við flóttafólk er mikilvægt að því standi til boða gagnreynd úrræði. „Strengthening Parenting Among Refugees in Europe“ (SPARE) er úrræði byggt á gagnreyndu meðferðinni „Parent Management Training – Oregon“ (PMTO) en verið er að aðlaga SPARE að flóttafólki í Evrópu. Fjórar Evrópuþjóðir taka þátt í SPARE-verkefninu og í þessari rannsókn er farið yfir tiltekin gögn frá tveimur hópum á Íslandi. SPARE þjálfar foreldra í að vera kennarar barna sinna og hjálpa þeim að aðlagast nýju menningunni sem þeir tilheyra. Markmið rannsóknarinnar, sem hér er greint frá, er að meta fýsileika SPARE miðað við tiltekin gögn og hópa ásamt því að kanna hvort úrræðið bæti foreldrafærni, dragi úr aðlögunarvanda og auki vellíðan foreldra. Þátttakendur voru alls 28, þar af 14 mæður og 14 feður sem höfðu öll stöðu flóttafólks á Íslandi og áttu börn á aldrinum tveggja til átján ára. Foreldrar svöruðu spurningalistum í byrjun og lok námskeiðs sem dreifðist á 12 skipti. Út frá þessum tveimur hópum og tilteknum gögnum sýndu niðurstöður að SPARE er fýsilegt úrræði fyrir flóttafólk á Íslandi. Þátttakendur voru ánægðir með úrræðið og var mæting og þátttaka góð. Foreldrafærni jókst og þá sérstaklega jákvæðar uppeldisaðferðir, aðlögunarvandi minnkaði og foreldrar upplifðu það sem minna vandamál. Mat foreldra á eigin vellíðan jókst en þó ekki marktækt. Þessar niðurstöður lofa góðu fyrir áframhaldandi rannsóknir á úrræðum fyrir flóttafólk þar sem þörfin fyrir slík úrræði er mikil.