Stýrifærnivandi barna: Tengsl BRIEF listans við aldur, kyn og ADHD einkenni

Skilningur á stýrifærni er mikilvægur liður í því að ná utan um þroskaferil barna. Stýrifærni felur meðal annars í sér sjálfsstjórn, hömlun, skipulag og yfirsýn, til að ná fram settum markmiðum og gegnir því mikilvægu hlutverki í daglegu lífi. Tilgangur þessarar rannsóknar var að varpa ljósi á birtingarmynd stýrifærnivanda eftir aldri og kyni ásamt tengslum við ADHD einkenni. Til þess var framkvæmd rannsókn meðal 600 barna í 4.-10. bekk, þar sem foreldrar voru beðnir um að svara Behavior Rating Inventory of Executive Functions (BRIEF) listanum. Börnin voru á aldrinum 8-15 ára, en stelpur voru 322 og strákar 274. Markmið rannsóknarinnar var að athuga aldursmun á stýrifærnivanda og hvort kynjamunur kæmi fram á þáttum BRIEF listans. Jafnframt var gert ráð fyrir að börn með meiri stýrifærnivanda væru með meiri ADHD einkenni á Ofvirknikvarðanum. Niðurstöður sýndu marktækan mun á aldurshópunum en við nánari athugun var sá munur einskorðaður við einn undirþátt BRIEF listans, Tilfinningastjórn. Niðurstöður sýndu marktækan kynjamun og sýndu stelpur að meðaltali minni stýrifærnivanda á flestum þáttum BRIEF listans. Börn með há skor á Ofvirknikvarðanum sýndu marktækt meiri stýrifærnivanda en börn með lág skor, óháð kyni. Niðurstöður þessarar rannsóknar varpa ljósi á mynstur stýrifærnivanda barna á ólíkum aldri, eftir kyni og tengslum hans við ADHD einkenni.